餵人奶呢條路，真係好似打機咁有唔同攻略。 尤其係「點樣先可以增奶」呢個問題，坊間有十萬個說法，我哋同大家拆解幾個常見誤解’👇🏻
🔸 隔耐啲先泵 vs 泵密啲
✅餵／泵密啲贏！
奶量係「按需求供應」，餵／泵得密＝身體收到「唔夠貨」嘅訊號，自然會增加產量。隔太耐或者乳房好谷先餵／泵，身體會以為「夠喇喎」甚至‘太多奶’，就會慢慢減產。
🔸 好谷先泵 vs 定時泵奶
✅ 定時泵贏！
等到「好谷」先泵，一來容易塞奶，二來谷奶會令身體產生抑制物，減少造奶。定時泵（例如每3個鐘）係身體「穩定交貨」
🔸 只日間泵 vs 日夜都泵
✅ 日夜都泵贏！
催乳素喺夜間分泌較多，係刺激造奶嘅黃金時段。夜間冇餵／泵奶日間嘅奶量都會少啲。
🔸 增長每次泵奶時間 vs 增加每日泵奶次數
✅增加次數贏！
泵得耐唔等於泵到多奶。反而增加次數（例如由一日6次變8次）先可以有效刺激造奶。
每次泵到鬆軟就夠，唔好死泵爛泵呀⏱️
